Cyngor Ieuenctid Ceredigion yn sgwrsio gydag Elin Jones AS
Ar 02 Rhagfyr 2024, ymwelodd aelodau o Gyngor Ieuenctid Ceredigion â Senedd Cymru yng Nghaerdydd, a chyfarfod ag Elin Jones AS i drafod materion allweddol sy’n bwysig i bobl ifanc.
Fel rhan o raglen waith blynyddol Cyngor Ieuenctid Ceredigion, cafodd pobl ifanc daith addysgol o amgylch y Senedd, a chyfle i eistedd i lawr gyda’r Llywydd i gyflwyno cyfres o gwestiynau yn canolbwyntio ar amrywiaeth o faterion lleol gan gynnwys trafnidiaeth, addysg, a materion iechyd.
Nod Cyngor Ieuenctid Ceredigion yw meithrin a chynnal cysylltiadau rhwng pobl ifanc a Senedd Cymru a Senedd y DU drwy Aelodau Seneddol Ceredigion, er mwyn sicrhau bod llais pobl ifanc Ceredigion yn cael ei gynrychioli ar faterion sy’n effeithio arnynt.
Dywedodd Lleucu Nest, Aelod newydd Senedd Ieuenctid y DU dros Geredigion a disgybl yn Ysgol Gyfun Penweddig: “Roedd yn gyfle gwych i gyflwyno a thrafod meysydd blaenoriaeth allweddol gydag Elin Jones yn y Senedd yn ddiweddar. Trafodwyd sawl pwnc pwysig a diddorol iawn oedd cael y cyfle i ddysgu mwy am waith Senedd Cymru a’r hyn sy’n mynd ymlaen yn y Senedd.
“Mae’n hanfodol bwysig bod pobl ifanc yn cael llwyfan i rannu eu barn / sylwadau ac roedd hwn yn gyfle perffaith i wneud hynny. Hoffai Cyngor Ieuenctid Ceredigion ddiolch i’r Llywydd am drafodaeth ddiddorol a chadarnhaol ac am roi o’i hamser i siarad â ni. Fe wnaethon ni i gyd fwynhau’r profiad.”
Dywedodd Elin Jones AS: “Roedd yn bleser cael croesawu Cyngor Ieuenctid Ceredigion i’r Senedd am daith a sgwrs. Mae wastad yn braf cael cwrdd â phobl ifanc sydd â diddordeb mewn gwleidyddiaeth a’r byd o’u cwmpas. Roedd y drafodaeth yn eang ac aeddfed – o faterion trafnidiaeth i addysg, i gefnogaeth arbennig i bobol ifanc.”
I gael y wybodaeth ddiweddaraf ar Gwasanaeth Ieuenctid Ceredigion, dilynwch nhw ar Facebook: Gwasanaeth Ieuenctid Ceredigion Youth Service; @giceredigionys ar Instagram ac X.